设置 : 设为首页 | 加入收藏
    更换皮肤:
  •   
  •   
  •   
  •   

名家推介:时好时坏玩谢罗马

发布时间: 2019/3/6 【字体:

时好时坏玩谢罗马

2019/03/06 文:欧联不夜天:黄兴桂

今晚续有欧联16强次回合,先讲冇咁受人关注嗰场,就係波图主场迎战罗马,我比较睇好波图可反胜晋级,何解呢?虽然首回合佢哋先输1比2,但取得1个极为重要嘅作客入球,今仗只要赢1比0就可出线。

睇番呢支葡超劲旅于日前联赛硬撼死敌宾菲加,踢到就住就住,最终反输1比2,可见佢哋已将全副心机放晒喺收入更丰厚嘅欧联赛事上。另一边厢,罗马一向係海鲜波,上届可以喺8强淘汰巴塞隆拿,但今届分组赛对住柏辛域陀尼亚都输得,加上揸住1球领先优势并唔稳阵,如果改踢佢哋唔擅长嘅守势波,随时作茧自缚,波图有力绝地反胜。

曼联出线得两个可能

相反,首回合在主场净输0比2嘅曼联,今仗作客再斗巴黎圣日耳门(PSG)想出线,真係要靠奇迹或神明打救。一来首回合PSG冇尼马同卡云尼都赢得咁轻鬆,净係一个基利安麦巴比就玩残曼联防线,就算今仗前两者唔出得都未惊过;二来红魔亦伤兵满营,中场核心保罗普巴更要坐波监,需知道看守领队苏斯克查带队后翻生,与普巴大爆发有关,今仗冇咗呢位进攻泉源,曼联欲反胜晋级,机会只得两个──渺茫同冇机会。